Kryetari i Komunës së Vitisë, Sokol Haliti ka bërë të ditur se nga nesër do të merr vendim për mos aplikimin e përdorimit të Doracakëve ‘Edukimi Seksual dhe Shëndeti Riprodhues’ për nivelet 1-5, 6-9 dhe 10-12 në shkollat në këtë komunë.

Këtë vendim e kanë marr edhe Komuna e Prishtinës, Skenderajt dhe Fushë Kosovës, përcjell Arbresh.info.

Me anë të një postimi në Facebook, Haliti tha se përmbajtja e këtyre doracakëve nuk është e përshtatshme për fëmijët dhe nxënësit dhe siç potencon ai, mund të ndikojë negativisht në zhvillimin e tyre të shëndetshëm.

“Ky vendim do të merret pasi kemi shqyrtuar përmbajtjen e këtyre udhëzimeve dhe shqetësimet e ngritura nga përfaqësuesit e Komunës dhe nga prindërit, lidhur me përshtatshmërinë e aktiviteteve dhe materialeve të propozuara. Ne besojmë se përmbajtja e këtyre doracakëve nuk është e përshtatshme për fëmijët dhe nxënësit tanë dhe mund të ndikojë negativisht në zhvillimin e tyre të shëndetshëm”, tha Haliti.

“Kjo është një masë që do të ndërmerret me qëllim mbrojtjen e interesave dhe mirëqenies së nxënësve tanë, si dhe për të siguruar që edukimi të jetë në përputhje me vlerat dhe normat tona”, tha Haliti./Arbresh.info